Sanguma is a Sin

Prot: 059/2012

Dia ol bratasusa bilong Daiosis bilong Mendi,

Sanguma em i bikpela sin. Kilim man o meri long pasin bilong Sanguma em i bikpela sin.

Gutpela wasman bilong sipsip i mas lukautim banis na protektim ol sipsip bilong em long ol weldok.  Nau, long Daiosis bilong Mendi, wanpela bikpela weldok i wok long ran na i laik bagarapim banis bilong daiosis bilong yumi, na mi mas sanap bilong lukautim dispela banis.  Ol i save kolim dispela weldok olsem: sanguma (o posin o soseri).

Long dispela wik i go pinis, long wanpela viles klostu long Kumin – we ol i ken harim krai bilong belo bilong Katedral haus lotu – sampela manmeri i bin sutim tok wanpela o moa meri na i tok olsem: em sanguma.  Mi lukim pinis sampela poto sampela manmeri i bin kisim long olgeta dispela samting i bin kamap.  Mi lukim, ol i bin rausim ol klos blong dispela meri. Ol i bin pasim ai bilong em long wanpela laplap. Ol i bin taitim han blong em long rop na pulim i go olsem Jisas long diwai kruse. Ol i bin katim em long busnaip. Ol i bin kukim em wantaim hotpela ain.  Ol i bin givim pen nogut tru long em.  Dispela samting i bin kamap long ai bilong planti manmeri.  Sampela katolik manmeri na sampela lida bilong komyuniti tu i bin stap na lukim dispela.  Planti pikinini tu i bin lukim ol dispela pasin nogut.

Mi mas tok klia na stret olsem:  olgeta man na meri husat i bin lukim dispela samting na i orait long en, na i no tok “nogat” long en, ol dispela lain i gat bikpela sin.  Dispela samting i bagarapim laip bilong oltaim insait long sol bilong man na meri. Mi singautim yupela long tanim bel, mekim wok penens, go long konfesio na wok bung wantaim bilong rausim dispela kain pasin nogut long komyuniti bilong yumi.

Ol Katolik manmeri i no ken bilip long sanguma, posin, soseri.  Ol dispela pasin em haiden pasin.  Sanguma em i bikpela sin tru.  

Long Buk Baibel, Santu Pol i raitim olsem: "Olgeta man i mekim ol dispela kain pasin (posin na narapela bikpela sin), ol bai i no inap go insait long kingdom bilong God"  (Gal 5: 19-21).

Pasin bilong bagarapim bodi na givim pen long narapela man o meri, olsem ol i bin givim pen long dispela meri, dispela kain pasin i brukim lo bilong olgeta kantri, i brukim lo bilong Papua Niugini, na moa yet i brukim na bagarapim lo bilong God.  Mi singautim ol lida na polis na ol politisen, bai ol i sanap strong long bihainim lo bilong PNG na i bringim ol manmeri husat i brukim dispela lo long kot.  Na mi singautim ol manmeri long ples bai ol i sapotim ol polis long mekim wok olsem.

Yumi save harim planti toktok olsem: divelopmen em i bikpela samting.  Nogut yumi tok long divelopmen na yumi tingim mani tasol.  Sapos no gat divelopmen long gutpela tingting na stretpela pasin na human divelopmen, orait, kantri blong yumi bai no go het, nogat, em bai lus olgeta.  Ol bratasusa, nau em i taim bilong rausim dispela bikpela hevi na sem i stap long komyuniti bilong yumi, kantri bilong yumi, na sios blong yumi.  NAU.

Bilong  rausim dispela pasin nogut, mi singautim ol bilipmanmeri long mekim wanpela Novena bilong Penans na Singautim Marimari blong God.  Dispela Novena  bai stat long taim ol i ritim dispela pas long haus lotu bilong yupela, na em bai i go inap long 9-pela de olgeta.  Sampela we long makim dispela Novena em i olsem:  tambu long sampela kaikai o sampela samting, pre long askim marimari blong God, mekim sampela wok sol long peris, mekim narapela wok long soim laikpasin long sampela lain tarangu i gat sampela nid long en.  Ol lida bilong ol peris i ken wok wantaim ol peris pris na ol sista bilong painim gutpela we bilong makim dispela Novena.  Mi askim bai dispela Novena i kamap long olgeta hap bilong daiosis bilong yumi bikos dispela pasin nogut i stap long planti ples bilong daiosis na yumi olgeta i mas wok bung wantaim bilong  rausim ol dispela haiden pasin, pasin sanguma, pasin kros na vailens long olgeta komyuniti bilong daiosis bilong yumi.

Tenk yu long stap wanbel wantaim Sios.

Papa bilong mipela … rausim olgeta samting nogut long mipela.  Amen.

O Maria, Mama bilong Gutpela Wasman blong ol sipsip, pre bilong helpim mipela. Amen.

Santu Maikel, yu strongpela han bilong God.  Yu ensel i lukautim kantri bilong mipela.  Sambai long mipela long taim Seten i laik traim mipela.  Was gut long Katolik Sios bai em i kamap strong.  Na bringim bek ol manmeri i ranawe long God, nogut ol i lus olgeta.  Wokabaut wantaim mipela long rot i got long heven, bai mipela wantaim olgeta ensel na olgeta santu i ken onaim God, oltaim, oltaim.  Amen.

Bisop Don

(Pastoral Letter warning against the evils of sorcery and the retribution violence that often follows an accusation of sorcery.)